| 0 التعليقات ]


بعد السلام والمرحبا

يا اولاد بلدنا يا طيبين

نفرش كلام المصطبة

واضح لكل السامعين

مصر الحبيبة الطيبة

أم البنيّة  والبنين

ايش حالها في عز الصبا

ايش حال ولادها المخلصين

وسط العواصف مركبة 

بين ريح شمال وريح يمين

جابوا الطبيب ابن الحلال

كشف مكان الداء وشاف وقال

أهل البصيرة في البلد

جواب لكل السائلين

قال البلد عاوزه ولد

ياخد بتار  المظلومين

ولد يعوض اللي راح

ويعلا فوق كل الجراح

ويمد إيده في الضباب

يشد أنوار الصباح

فيكم ولد يا سامعين ؟

أجدع ولد

طب هوه فين ؟ وهوه مين؟

  ابن البلد

يا ابن البلد يا ابن البلد

الوقت وقتك يا ولد

يا قلب مصر ونبضها

  يا ابن البلد يا ابن البلد

يا صبحها

كورس: يا ابن البلد

يا ربحها

كورس: يا ابن البلد

يا قمحها

  يا ابن البلد

يا رمحها

يا نور سماها وأرضها

آدي كلام المصطبة يا اولاد بلدنا يا طيبين

بعد السلام والمرحبا واضح لكل السامعين

0 التعليقات

إرسال تعليق