قصيدة بسكويت بايش للشاعر هيثم دبور

أطلق الأنوار فى قلبك
والفراشات الحنونة ترسم الألوان فى عينك
فينك انتا.. قوللى فينك
من زمان وشك مكلضم
ليه تسيبهم ينجحوا فى تعقيد حواجبك
يطمسوا الغنوة الشقية فوق جبينك
هى شمس العيد بتطلع بالأوامر!
ربك انت لوحده قادر
يبقى سيب اليوم حمولك
عيش شوية..
أو تعايش
هو إيه العمر غير بسكوت وبايش
جنب شاى الصبح بدرى
مش مقرمش بين شفايفك
سخن دايب
هى إيه الجنة غير انك بتفطر
ويّا بسمات الحبايب
لما تلقى حد صاحى عشان يقول لك
والعماص لساه فى عينيه
«كل لحظة وانت طيب»
حاجة تخطف عقل بالك
تلقى فرج الله قبالك
جاى قريب