| 0 التعليقات ]
دخل الحياة خالى الوفاض
دخل الحياة من غير ما يتحمل مخاض
دخل ومجبر ع الدخول
مع إنه مخلوق لاعتراض
حيوان مقاوم الانقراض
قادر يطوع أى صعب
الصخر شقق جتته
بيدقه لجل يلاقى نار
والنار بتتحول لنور
فوانيس وقايدة فى سكته
وبيت صغير م الدفا
وزرع تحت البيت يخضر دنيته
زوجة وعيال
وحلم مش صعب المنال
وخوفه يخسر ما بناه خلاه ذليل
واحد فى شعب بيحكمه..
واحد عليل
اخلع قيودك م الحياة
وامشى فى وطنك حافى مستبيع مخيف
واصرخ بقوة وامتعاض:
أنا اللى خارج م الحياة خالى الوفاض

0 التعليقات

إرسال تعليق