قصيدة يا صاحبي للشاعرة دعاء عبد الوهاب

يا صاحبى ياللى الحلم مش قادر تحلمه ...
ياللى جواك كلام ممنوع تتكلمه ...
قاسية الحياة أوقات .. وأوقات مبهجة ...
بس أما تاخد درس .. ياريت تتعلمه ...

جربت كلمة أيوه .. طب جرب مرة لأ ...
بتقول كلام ع الكيف .. طب مرة قول الحق ..
خايف من مين وليه؟ .. ما تسيبها ع الخالق ...
رزق الطيور ف السما والنمل جوه الشق ...

طول ما انت غاوى سكوت حقك هيفضل ضايع ...
ومهما تيجى تفوت هتلاقى نفسك راجع ...
متقولش إيه هيفيد صوتى ف زحمة بشر ...
دى الكلمة لو م القلب بتشيل هموم و مواجع ...

اقرا يا صاحبى اللى فات وارسم خطوط بكره ...
حتى الوصول للقمر ف الأصل كان فكره ...
قلبك و حلمك و صوتك .. والقلم ف ايديك ...
هيعيشوا بعد الحياة .. ويكونوا ليك ذكرى