قصيدة جنحاتي تقدر تطير للشاعر محمد السيد

ببعت رسالة موجهه لكل الظروف
طعم الحياة مبيتحرمش من الفقير
جناحاتى رغم القصقصة بتقدر تطير
ومفيش تذاكر للفضا
ومفيش ضرايب ع اللضا
ومفيش كمان شبهة خلاف
مابين عنادى والرضا
لكن خلافى مع المقولة المغرضة
ان الفلوس مش كل حاجة وكل شئ
مع انى برهن خطوتى قبل الطريق
وادفع ضرايب ع الامانى وع الطموح
حلمى اللى كان ساكن معايا على السطوح
سابنى وطفش
وانا ريقى ميت م العطش ومن المرار
لكنى رافض للخضوع قدام ظروف
رافض اعيش من غير ماشوف يوم يبتسم
يا طريق بيرفض يترسم انا هرسمك
هحميك من اللى بيسرقو منك أنا
ايه يعنى فات تلاتين سنة من غير أمل
الحلم برده هيكتمل
والانهيار مش محتمل وماهوش مصير
صبرا كتيييييييير
جناحاتى رغم القصقصة بتقدر تطير