قصيدة ما دايم إلا وجه الله للشاعر زياد علي

ما دايم إلا وجه الله..
و بعده إنتى..
يا لعنة لسة راكبانى
يا سر جنوحى و جنانى
يا جرح يحز شريانى
و يغرز نصله فى رقبتى
جرالك إيه يا نساية؟؟
أنا إللى شلت غمة ليلك الأبدى
أنا الميت فى حضن الحلم و الراية
و أنا إللى قلت بسم الله
فى أول سطر فى حكاية
حروفها مكتوبين بالنور
و أنا المنحور
و أنا إللى رغم خذلانك
ما زلت بَ أثور
و لسة الحق جوايا
ما زال منصور
و أنا إللى لما أشوف وشى
يبص ف عينى فى مراية
بكون مكسوف
و بخجل من ساعات الخوف
و أركز في ملامحى
ألقى شهدائك....
..........
يكونش العشق ده دائى؟
و نكران الجميل دائك؟؟؟