قصيدة دبابة للشاعرة دعاء عبد الوهاب

ياما رسمت و انا صغير ..
دبابة ف كراريس الرسم ..
ياما عملت بإيدى مسدس ..
زى الظابط جوه الفيلم ..

و اما يقولوا دا عيد النصر ..
كنت افضل فرحان مستنى ..
مش علشان راح يبقى أجازة ..
علشان باسمع حكايات عمى ..
عن رجالة بقلب أُسود
عن بارليف و تراب و حدود
و اما اسأله و انا عينى بتلمع ..
" كانوا جايين م الجنة يا عمو ؟؟ "
يضحك أوى و عينيه بتدمٌع ..
و يقول لأ .. دول كانوا جنود

و النهاردة ..
لسه بافرح لما اعدى من شارعنا ..
لما اشوف فوق مدرستنا ..
العلم لساه مرفرف ..
و اما باسمع م الطابور صوت العيال ..
تحيـــــــا مصــــر
بين ضلوعى قلبى يهتف ..

بس مش هارسم خلاص الدبابات ..
و اما عيد النصر ييجى ..
مش هاردد ف حكايات ..
ما الجنود غير الجنود ..
و القلوب صبحت ديابة ..
مش قلوب زى الأُسود ..
و العيون مبقتش تلمع ..
اتملِت حسرة و دموع ..
لما شفت فوق ايديهم دم سايل ..
بس مش دم الأعادى ..
أصل اخويا هو اللى مات