قصيدة لو قالولك للشاعرة دعاء عبد الوهاب

لو قالولِك إنى يائس
و إن حِملِك زاد عليا ..
لو قالولِك إنى تايـه
و الخطاوى دايرة بيـا ..
لو قالولِك ..
إن لون الضلمة قاسـى
و إن روحى بقِت كفيفة
لما صابنى طَلق غادر بين عينيا ..
لو قالولِك إنى حتى بقيت شهيد

رُدى و انتى رافعة راسِك ..
قولى دُول زينة عيالى
من سَمارهُم ..
تشرق الشمس ف سمايا
و بدموعهم ..
بامسح الحزن اللى عشش بين سنينى
عُمرى يتحنَّى بدماهم
و بهتافهم ف الميدان
مرفوع جبينى

رُدِّى و انتى رافعة راسك
دول ولادى
مهما خافوا ..
مهما بعدوا ..
مهما شافوا من صنوف الظلم ياما
مهما حسوا من ليالى الغدر قسوة
و ف عيون الناس ملامة
يفضلوا زِينة عيالى
يفضلوا زينة عيالى