قصيدة يا مصر مالك للشاعرة دعاء عبد الوهاب

يا مصر مالِك ؟؟
حيرنى حالِك
بتقسى و اللا سايقة ف دلالك ؟؟
الصح فيكى و كأنه غلطة
و الغلطة فيكى تقلب بورطة
و الورطة خبطة ف قلوب عيالك
يا مصر يا ام العيون حزينة
العيب ده منك و اللا بايدينا ؟؟
ثورة و ثُرنا ...
دم و رَوينا ....
و اما ابتدينا ...
لقينا غيرنا أكلوها تورتة

يا مصر قلت كل الى عندى
و شفت عمرى عمَّال يعدى
و لا بعت مرة ولا خنت عهدى
طب ليه تعاندى ؟؟
ليه يبقى صوتك
معناه سكوتى ؟
ليه تجرحينى حتى ف موتى ؟
دا أنا كل همِّى كان فَرْحِك انتى
لا طلبت راحتى .. ولا حتى قُوتى

دا انا كنت راضى أرسم نهارك
و يكون نصيبى م الدنيا ليل
و كنت قابِل أفرش دمايا
زادِك و نيلك السلسبيل
دلوقتى لما رفعت راسِك
ترضيلى يا امَّه أصبح ذليل ؟؟!!!!