قصيدة الطابور للشاعرة دعاء عبد الوهاب

أنا مصرى و الطوابير ..
موصوفة ف بطاقتى
طابور يجُر طابور ..
من صحتى و طاقتى
طابور عشان العيش و لقمة مدعومة
و طابور عشان إمضا
على ورَقى يا حكومة
و طابور عشان تطعيم
و طابور عشان تعليم
و عشان رقم قومى ..
و صورة مختومة
طابور عشان أنبوبة
و الغاز ف تل أبيب
و طابور عشان الجيش
و مركز التجنيد
و طابور عشان عيان
و طابور عشان فَلسَان
و انا راضى بمكانى ..
و باقول قدَر و نصيب
إلا الطابور ده و بس
واقف وانا فرحان
أصل الطابور ده و بس
واقف عشان انسان


و عندى كلمة كمان ......
لو حاسس التغيير
و بكره ف عيونك
بقى لونه أحلى كتير
لو شايف إن احنا
بقى لينا صوت و مكان ...
قولها بصوت عالى
قولها و من قلبك
شكراً لكل شهيد
سال دمه ف الميدان
شكراً لكل شهيد
ضحَّى عشان بُكره
و اختار لنفسُه الموت
علشان تعيش انسان

قولها بصوت عااااااالى
قولها و من قلبك
و اقرالهُم الفاتحة