قصيدة افتح عينيك للشاعرة دعاء عبد الوهاب

افتح عينيك
اسمع و شوف
أول دروس الجدعنة
إعرف يا واد طبع الرجال
و افهم معانى الحق
و الخيــــر ...
و النضــال ...
و افهم كمان
إن الحياة ف الذل
مـــوت ..
و ان الجرئ ..
ميبعش عُمره بالسكوت
و لما تكبـــر
تطلع عنيد كده زى ابوك
تنطق تقول الحق
مهما يخوفوك
ترفض جبينك ينحنى
أو يوم تفرَّط ف دم اخوك
إوعاك يا واد تطلع طرِى
و قلبك هزيل
إوعاك تصدق إن فيه شئ
مستحيــل
و لما تكبر
إعشق ترابها زى ابوك
إعشق غيطانها و الغلابة الطيبين
و اسكن بيوتها و القهاوى السهرانين
و اروِى الفؤاد
من شهد نيلها السلسبيل
و اعمِل عشانها المستحيل
مالَك يا واد ؟؟؟
كشَّرت ليه ؟؟؟
أيــوه صحيح ..
حقك عليا ..
أنا اللى بس سهواً نسيت
إن القاموس المصرى مفيهوش
مستحيــــــل ..

إلى خالد علاء عبد الفتاح
إلى اتولد و أبوه ف السجن
بيتحاكم عسكرياً علشان يدفع تمن صوته
و تمن حريتنا