قصيدة عرقين خشب للشاعر محمد السيد

عرقين خشب
عمدان لسقالة شقي
وأيدين فقير متعلقة.. في الكام جنيه
وهيعمل ايه
الدنيا أخدت ضحكته.. وضحكت عليه
والخوف مكتف خطوته
ويوماتي علشان لقمته
الموت بيلعب لعبته.. قدام عنيه
ومفيش هزار
العمر مش لعبة قمار
والتضحية.. أوقات مبتكونش اختيار
لكنه علشان الصغار
علق سنين عمره ف هوا
عشان رغيف علشان دوا
علشان يحوش كام أمل.. ضد الظروف
محتاج يشوف
من تحت عقب الحلم.. حبه ضي جي
ويوماتي بيموت م التعب
لكنه حي