قصيدة لو تفرحي للشاعر مايكل عادل

من دون ولاد الخَلق

ليا وَطَن يتعاش

فيه الرغيف بالدم

أمّا الفَرَح ببلاش

فيه الجعان يشبع غُنا طول الليالي معاه

و في النهار متهان

و دموعه ماتسواش

و الضُهر بيناجي بلاده اللي أكيد سامعاه

و فـ وقت شدتها

ع الحبايب تكون جامعاه

يبدأ كلامه غُنا

و الناس تقول الله

لو تفرحي

مصر النعيم و الضل مفرودة ع الدُنيا

مصر الميدان مليان

في أقل من ثانية

مصر الولاد الحلوة و الصبايا الحور

مصر النهار طالع

مصر الضلام بيغور

أنده عليها و اقول سيّد أيا درويش

و الشيخ إمام يهتف

شيّد قصورك عِيش

و انا نفسي اموتلك شهيد

حتى فـ طابور العيش

لو تفرحي

لو تفرحي يا مصر راح تفرحلك الأكوان

يا ست كُل العهود

يا حارسة الأزمان

يا جوع بطول النهار

يا مائدة رحمَن

بلقى عليكي من الشَبَع ما لذ و طاب

و القى فـ مدارسك ع الدكك

ألذ صحاب

و القاكي بتقابلي نهارنا بالترحاب

و القاني بناديكي و ديك الصبح بينادي

و افضل أعلّم بيكي معنى الحُب لولادي

و اسهر أنا مُشتاق

محسود على بلادي

من دون ولاد الخَلق