قصيدة بقي معقول للشاعرة دعاء عبد الوهاب

بقى معقول ؟؟
بعد ما صوتك هَـز جمودهم ..
يبقى كلامك مش مقبول ؟؟
يمنعوا عنك توب الفرحة ..
مع إنه بحلمك مغزول ؟؟؟
لأ و يقولوا عليك الجانى ..
وانت اللى قُصادهم مقتول !!!
بقى معقول ؟؟

بعد ما كنت ف عينهم فارس ..
قفلوا عنيهم مش شايفينك ..
كنت الرمـز و روح الثورة ..
دلوقتى قلوبهم ناكرينك ..
بعد ما كنت الفجر الطالع ..
فجأة بقيت نبتة شياطين ؟؟؟
بيكدِّبوا صدقك و إيمانك ..
و بيبلعوا كدب التعابين !!!
بقى معقول ؟؟

بقى معقول علشان يرتاحوا ..
و يباتوا ف حضن البطاطين ...
و يرستأوا ع الكنبة مكانهم ..
و يقوموا ب دور الفاهمين ...
يبقى يسيبوا اللى بيظلمهم ..
و يقولوا عليك المسئول !!!!!
بقى معقول ؟؟؟؟