لما الحمول تزيد..
ونرجع ونسأل من جديد..
ومانلاقيش غير الأسف..
ناديت على القمر أنا
عطشان ونس..
بص بخجل ليه واتكسف..
ومشيت كتير..
وداريت الحزن
فى ألف بير..
بس اتكشف..
مشيت أمل..
ومشيت فرح..
ومشيت زهق..
ومشيت ملل..
ومشيت كده من غير هدف..
وقلت من قلبى كلام..
ماعرفش ليه كله اتحذف..
كان نفسى أغنى للسلام..
لكن حبيبتى..
للأسف...

ده مش عنوان مطعم
للفراخ والبيتزا
ده ميدان للشرف والكرامة والعزة
دى روح البلد
ودول بقى.. المصريين
كأنهم فى الحج
سعى وطواف وعرفات ورمى جمرات
على وش إبليس
فرح وأغانى وعروسة وعريس
قداس.. وقلوب بتحرس مصر
من رصاص المجرمين
والكل بيقول يارب
والكل بيقول آمين
سنين.. عايشين تحت احتلال
مجرم.. سافل.. قاتل
لا ذمة ولا ملة ولا دين
عارف
ف رغيف العيش
ف الزيت والسكر
فى الهم.. والغم
فى صباحكم اللى زى الطين..
مسامحين
إنما قولولى بقى
ده يرضى مين
وإزاى نسامح اللى حرق غية الحمام
وزرع قناصين مأجورين
دم الشباب ده
يرضى مين
أجمل وأشرف ما فينا
نظرة عينيهم البريئة
بتبص علينا وتقول كلام
والله لو اجتمع كل شعراء العالم
ما يعرفوا يوصفوه
اتفوه عليكم اتفوه
هاتقولوا إيه لأمه
وبإيه راح تعوضوا أبوه
كل خزاين الدولة
ع اللى نهبتوه
ما يساوى ضفر أصغرهم
اتفوه عليكم اتفوه
ده كان أول دفعته ف الكلية
وده كان بيرسم
وده كان بيكتب أغنية لبلد
كانت بتحمى اللى قتلوه
اتفوه عليكم اتفوه

لدرجة إن كل همومنا
مع أول ضحكة بتتنسى
ولما العصفورة ... بتعملها على هدومنا
بنصدق إننا هانتكسى
ولما نهرش ف إيدينا
ولما بترف عنينا
ولما إيه؟
يتنصب علينا
نقول نصيب
ننضرب
نقول ده ضرب الحبيب
نتسرق
نقول ف بيتها
وآدى آخرتها
شوفتوا بقى
إحنا طيبين أد إيه
بنسامح اللى بيجرحنا
قاصد
وعن عمد
ونقوم الصبح
نبص ف مرايه
ونقول اللهم لك الحمد
يارب ديمها نعمة
واحفظها من الزوال
ولما يدق الفرح بابنا
نقول ده رزق العيال
وآدينا عايشين
شوفتوا بقى
إحنا أد إيه طيبين

بتكلم عن ستات..
من قلب المحروسة..
لما الأمل مات
طلع لهم شنبات..
وماتت فيهم الأنوثة..
لا كحل..
ولا مرايا..
ولا سرير بعمدان..
ومفيش ف الشارع غير خوف
ومفيش فى الليل
غير برد وكوابيس..
ومفيش فى البيت
غير أحزان
والبرنامج الانتخابى للرئيس..
حتى ابتسامة العيال
انطفت
واختفت فى زحمة
الكتب والكراريس..
ستات
تصحى الصبح
تفتش ع النهار
وتدور فى الكيس
على أجرة الميكروباص
عشان تروح نفس المشوار
وتبص تانى على الدكاكين
ومتلقيش غير بقايا الريش
والعضم..
وتقدم فواتير الحزن
وتحلم حتى بخصم
وبرضه مفيش

كلها حاجات بسيطة

وأد إيه بتفرق معايا

أد إيه..

زي إيه..؟

زي لما الفرحة تيجي لوحدها

زي إحساس بالرضا

وزي ما حبك كده

وزي دمعة طيبة

أرتاح بعدها

وماعرفش ليه..

وزي إيه..

زي وردة ف عيد ميلادي

وزي يوم بسيط وعادي

عدي لكن مانستهوش..

وكلمة حلوة سمعتها

من قلب حد ماعرفهوش..

زي ما فضفض معاك

بكلمتين..

وف وسطهم أسرح

تقوللي روحت فين..

وزي إحساس بالأمان

لما ليلة أبات ف حضن

أصغر ولادي..

وزي غنوة من بعيد

فيها من ريحة بلادي

كلها حاجات بسيطة

وأد إيه بتفرق معايا..

أد إيه..

على باب سفاره كندا
لمحت أبليس وف أيده أستماره
بقوله على فين
قالى بص يا هجره يا أعاره
يا عم كفرت زهقت ألاقيش معاك سيجاره
أنا أنتهيت خلاص
لا نافع وسواس ولاخناس
و لا ليا عيش وسط الناس دى
عالم مجرمين
عندكوا فائض ف الفساد فى كل البلاد
ومش محتاجين شياطين
مليش عيش ف البلد دى
بقالى سنين عاطل
وأنتوا بتعرفوا تقلبوا الحق باطل
وتسلكوا القاتل
وتمشوا ف جنازه المقتول
ومفيش مشاكل
يا عم ده أنا بقيت أوسوس بالمقلوب
وأقول للحرامى كفايه
هو انته مش هتـوب ؟؟؟

عارفه يامه

انا حاسس ان الموت

ماخدتش منك

غير الطرحه

والجلابيه السوده

ما انا كل ما اعدي

جنب الاوضه

اسمع صوتك..

وانتى بتضحكى ع الدني

اوبتدعي لى ...

روح.. ربنا معاك..

ها تسافر..

وهاترجع مجبور الخاطر

وها استناك...

طب اسندى على كتفى

بكره تقومي

بكره تخًفى

عارف مين يا ابنى

بيقع ويقوم

اوعى تدور ع الدفا

فى فلوس وهدوم

ومتنساش تحوش شويه

اصحاب..

وافرح اووى..

لما يدق الباب

وتلاقى حد بيحضنك

لوجه الله...

ياه

فاكره يامه لما كنتي

تعملى بصاره

وتدى منها لابله سارة

يرجع ف الطبق رز باللبن

يروح لام حسين..

يرجع صنيه بسيسه

تدى منها لخالتى بيسه..

يرجع الطبق مليان حب

معقوله فيه كده قلب..!

عارفه يامه

النهارده بقيت بخاف بجد

بخاف من اى حاجه

ومن اى حد..

بخاف غصب عني

اتخبط فى حد

او اطلب من حد يسال علي

لحسن يعمل محضر..

ويرفع قضيه

ويطلب تعويض

من اول هنا يامه

لازم نبدا من جديد

هو الفرح ليه يامه

شكله لسه بعيد؟؟

ادعى لى يامه

وانت بتبعد
ماعرفتش إن كانوا خدوك منى
ولا ردّوك من تانى..
طفل صغير..
ما بيعرفش ينام الليل إلا ف أحضانى..
معقولة كبرت.. كبرت
ووصلت لسن التجنيد..
ده أنا لسه امبارح باحسب عمرك
وبقول ع اليوم ده لسه بعيد..
أتاريه كان بيقرب..
قلتلى يامّه
ده أنا رايح الجيش
مش رايح أتغرب..
شهر ونص.. يعدوا قوام
من يومها عرفت الصبر
واتعلمت أعد على إيدى الأيام..
اسمريت اكتر من ما انت أسمر
واحلويت أكتر..
كلك أبوك.. الله يرحمه
وطولة العمر ليك..
واللى رزقنا بعد ما مات
قادر يحميك..
لايق فيك الأفرول لما اتأيف
بقيت أشتّى معك لما تشتّى
وأفتح قلبى للنسمة الحلوة
لماّ تصّيف..
البطة اللى فى الشنطة تاكلها مع زمايلك
ودى لقمة عشان ف القطر لما تجوع..
ما عرفش إزاى بتقدر تضحك من قلبك
وعينيك مليانة دموع..
ضحكت علىّ لما بقولك
فهّمنى يعنى إيه ٩٦ ساعة أجازة
العيش ده مخبوز طازة
قلتلى يامّه
عيش إيه وبطة إيه..؟
لو تعرفى تعبى شوية من حنية قلبك ف إزازة
كان على عينى
لو أقدر أنا متأخرش..
ورحت
وأتاريك زى الفرحة
اللى بتيجى فى العمر مرة ومابتتكررش..
ورجعت.. عريس
وزمايلك بيزفوك بالعلم
وعلى أد ما كان الألم
على أد ما كانت الفرحة
لسه كراسة أشعارك فى مكانها
كل ما باشتقلك أفتحها
وأمشى معاك من أول صفحة لآخر صفحة
دلوقتى بس عرفت يا ابنى
ليه لما كتبنا على الدبابة
الشعب يريد إسقاط النظام
ماحدش قدر يمسحها...